14.DE RECIPIENDIS
Recipiendi
ad nos venientes, secundum tempus quod discretio prelati vel quorumdam seniorum
providerit, ducantur in capitulum. Qui cum adducti fuerint, prosternant se in
medio capituli. Et interrogati a prelato quid querant, respondeant: Misericoriam
Dei et vestram. Quibus ad iussum prelati
erectis, exponat asperitatem ordinis, voluntatem eorum requirens. Qui si respondeant se velle cuncta servare
et seculo abrenutiare, dicat post cetera: Dominus
qui cepit, ipse perficiat. Et conventus respondeat: Amen. Et tunc, depositis vestibus secularibus et religiosis indutis,
in nostram societatem in capitulo recipiantur. Sed tamen adhuc, antequam
stabilitatem et communitatem promittant et obedientiam prelato et successoribus
suis faciant, tempus probationis assignetur.
<Nullus
recipiatur nisi requisitus an sit coniugatus, an servus, an ratiociniis
obligatus, vel alterius professionis, vel occultam habeat infirmitatem. Quod si
alterius religionis fuerit, non recipiatur in ordine nostro, nisi a capitulo
provinciali vel generali fuerit approbatus. Cistercienses non admittantur nisi
de speciali licentia domini pape.
Conventualis
prior nullum in conversum recipiat, in canonicum vero neminem, nisi requisito
consensu totius vel maioris partis capituli et obtento.
Nullus
recipiatur infra octodecim annos.
In
quolibet autem conventu eligantur tres idonei fratres
de communi consilio capituli, qui recipiendos in moribus et scientia
diligenter examinent et examinationem priori et capitulo referant, eorum iudicio,
an recipi debeant, relinquentes.>